simonshen
patreon
【讀者分享💰】這一夜，中環人終於感受到「南深圳金融文革」的震撼
🕑 Added 2021-07-27 23:02:00 +0000 UTC在家朗歷史性為香港奪取金牌的同一天，中環金融圈彷如鄭州，滿目瘡痍。恆生指數連續兩天跌逾千點，成交高達3600億元，破盡紀錄。本來股市起跌乃兵家常事，何足道也，反正早淪為南深圳。只是今次，金融圈中的「深淺藍」及「淺粉紅海歸」開始懷疑人生的一跌，絕對藉得細味其心路歷程。
故事應由螞蟻金服上市前失蹄說起。話說去年11月，這隻原本是全球歷史上最大的IPO，馬雲本可藉此成全球首富，上市前一天call off，全球目定口呆，繼而媽聲四起。但金融圈小粉紅很快便組織起來，說馬雲太囂張，螞蟻危害國家金融安全，必須監管，所以上市前call off總好於上市後才搞佢，大家向前看。最後大家都理解監管的做法，馬老師實在太不識抬舉，誤了大事，應有此報。
正當大家忘記過去，重新上路之際，隨著建黨大慶，滴滴出行又再於美國上市。當時金融圈海歸藍絲們，正盤算著如何抓緊滴滴在香港二次上市的機遇，大撈一筆。誰知才上市一天，監管又把滴滴app全國下架，全球又再一次目定口呆，而金融圈小粉紅又再一次組織起，說滴滴董事局中有鬼佬，恐怕會把中國的出行原始數據交到美國手上，那會洩漏機密，真係打仗時會曝露機密位置。
Come On，响地球上空有成萬粒衛星，Google Map可以數到北京天安門廣場有幾多個垃圾桶嘅時代，嗰d原始數據有咩用？衛星唔係影到戈壁沙漠有百幾個疑似發射井咩？但反正金融圈小粉紅信了，即使比起螞蟻失蹄事件有所動搖。
到上周，一聲令下，全國校外機構不得再商業經營，不得再資本操作，不得加大投資，必須變NGO，港美上市的中概教育股全部股價腰斬。金融圈的海歸分析員率先崩潰，認為正在消滅分析員的就業，因互聯網股不用分析，地產股不用分析，現在育股又不用分析，還有什麼行業要分析？某內地教育股董事形容是行業團滅，戲謔下半生要自己落場做返一對一私人補習維生。
終於，每一次都體諒政府的超深藍的金融業大佬，今次按奈不住，輕聲抱怨何以美國佬唔搞你，自己搞死自己。事實上，依家係每一行，只要唔係國企，都有進一步規管的風險，所以股王騰訊都可以一日唔見10%，連淡馬錫都話對政策無所適從。
其實國內的初創企業才是打擊最大。一開頭都是先搵雙馬投（化騰and雲），跟住搵鬼投（淡馬錫+中東主權基金+孫正義+鬼佬基金），隻隻大野都係佢哋主力。但打跛咗雙馬，螞蟻及滴滴的經驗，實在好難再買落去，望等到上市good 水。
回想二年前，有人提出攬炒國際金融中心，事後孔明又好，賽後檢討又好，依家睇返，其實唔work。一來，即使在侵侵時代，都只係個別人士出糧要出現金，放假只能遊大灣區，仔女依舊放洋升學就業。二來，其實集唔集到資，是否國際金融中心，who fucking cares? 全球最大單IPO都可以自己call off，去到美國上市都可以隔空整死你。Decision Maker都唔care嘅嘢，無咩好傾。
今時今日，真係要了解返，諗清楚decision maker要d咩，care d咩，先可討佢歡心。
Comments
wai leung
睇來中共應該想中國人返去百年前建黨嗰陣定喇
德州公
首先，做人要有記憶. 2018 年中共開始批鬥張五常，話佢鼓吹私有制. 然後有一班人跳出嚟話要消滅私有制添. 好明顯有人試緊今上嘅睇法. 喘摸一輪，終於現真身. 不過，提早奪取主上歡心嘅就升官發財，不再話下. 第二，睇番香港恆生指數走勢. 所有嘅事件，例如美中貿易戰，反送中，甚至美國制裁等等，完全無損香港恆生指數走勢，極其量打橫行，無大冧市. 我相信今次政策大轉變同樣. 股票價錢低殘，總係會有人入市. 正所謂殺頭生意有人做，蝕本生意無人做. 最緊要 risk adjusted return 有數計就得. 不過放眼未來，就唔使旨意萬人空巷買中國股票. 始終能夠準確分析天威嘅人士／投資者，萬中無一. 弄潮兒一個半個，係咁多. 股市暢旺將會成為絕唱. 喺 liquidity 有限嘅情況下，股票市場將會逐漸 malfunction, 然後一個金融中心就慢慢消失了.
pp lam
只要炒返起幾日，啲人就會唔記得左有咩風險
Good Year
其實佢D政策國企都打埋一份, 國企融錢易, 低息, 本業唔賺錢, 最賺錢就係借個名比關聯人士去融錢之後分返D比我, 搞搞下民企比政策打中, 比唔返舊錢國企, 中招既係邊個? 果D 咩咩城投, 咩咩風投金主係邊個? 違約邊個中招? 不言而喻。
r0ArRRr
其實金融都好多黃絲架.....
悉尼 袋鼠
赤共鬼国唔care金融攬炒，咁就very good啦！佢鬼國攬炒，威脅世界能力大減；至於一同攬炒嘅香港，『火燒金閣寺』**，唔使再同呢個鬼国做白手套、沾污香港盛名，何嘗唔係一種解脫？ **香港精神，唔受地理規限，就由香港人記憶繼續承傳！
Wong Terry
枉班金融藍屍諗住國安法唔關自己事，只要埋頭炒股票，捕捉「中資股番香港集資機遇」，就繼續有油水，結果真係好__搞笑。
Carson
望始作俑者快啲仆街死，阻人揾食尤如殺人父母
Good Year
頂真心又中
Good Year
普天之下漠非皇土
Joe
重點係decision maker care D 乜嘢，可能佢自己都唔清楚
Frances
咁decision maker 兩年前都care 嘅
CF and WS
再咁跌法，以後嗰d膽敢拋售中國香港股票，甚至沽空造淡謀利，「以達到危害國家安全穩定之目的」的大小投資者，五千國安警使唔使立案調查一下，並清晨6點爆門拘捕，再經指定法官拒絕保釋，未審先坐一年半載呢？
阿寶
你可以喺我度賺到錢，唔係因為你叻，而係因為我畀機會你！ 所以，你嘅即係我嘅，我嘅都係我嘅！
Kam
換個角度睇，美國唔全面禁止中國企業上市，只係所謂「加強監管」，正正係對付中國企業在外國集資嘅方法。以中國政府DNA而言，無論對方如何解釋監管係防止作假，佢都只會當對方係意圖刺探國家機密，進而控制國家資金。總之一切一切，都係敵人陰謀。既然係敵人陰謀，就要阻止，那怕會自傷其身。
ピーター・チェイ
一個言而無信的地府,又怎會容得下一個自由市場的香港,就好似以前上海那樣,香港人小心😔
Weeky Wong
搬起石頭砸人家對腳，fucking 掂呀！
