simonshen
patreon
【突發評論 🇦🇺】 澳洲大選結果：工黨政府繼續執政，客席簡析
🕑 Added 2025-05-04 02:01:01 +0000 UTC【澳洲大選結束，我們邀請了「堅離地袋鼠」主持 James 和大寶為大家提供第一時間的在地分析：】
澳洲聯邦大選仍在點票當中，但結果基本上已經塵埃落定——現任總理阿爾巴尼斯（Anthony Albanese）成功連任，帶領工黨取得壓倒性勝利，更創下多項歷史紀錄：佢係21年來首位成功連任嘅澳洲總理，自2004年霍華德（John Howard）以來再冇總理能夠連任；佢亦係35年來首位連任嘅工黨領袖，上一位做到呢點嘅已經要數到1990年時期嘅霍克（Bob Hawke）。
反觀反對黨，領袖達頓（Peter Dutton）喺其選區迪克森（Dickson）失利，成為澳洲史上首位喺大選中失去議席嘅聯邦反對黨領袖。整體而言，兩黨聯盟（Coalition）喺今次選舉中失去大量議席，明顯被選民唾棄。
根據初步結果，工黨喺眾議院150個席位中預計可取得76席，正好跨過組成多數政府所需門檻。選民普遍對工黨喺醫療、教育、住房同氣候變遷等政策上表示認同，阿爾巴尼斯亦喺勝選演說中承諾會繼續為所有澳洲人服務，推動一個更公平同包容嘅未來。
至於兩黨聯盟敗選原因，大致可歸納為以下幾點：
首先，生活成本壓力係選民最關心議題之一（例如租金、樓價、能源價格上升），而兩黨聯盟喺呢方面普遍被批評為無對策，相反，工黨就提出咗一系列具體援助措施，成功吸引中產同低收入群體。
再者，達頓強硬保守嘅形象唔受中間選民歡迎，連佢自己昆士蘭選區迪克森都保唔住，反映佢嘅政策立場未能凝聚支持。有評論甚至指出，佢嘅風格雖未至於「特朗普化」，但過於剛硬喺現今國際局勢動盪之下顯得格格不入。
此外，佢喺競選初期提出要公務員取消在家工作，雖然後來澄清，但開咗個唔好嘅頭，亦令佢形象受損。
最後，兩黨聯盟大力推動興建核設施，但社會上未形成共識，令其喺能源議題上亦失分不少。
平心而論，對我嚟講，兩黨喺解決生活成本問題方面嘅主張並無太大分別，選民可能寧願畀現屆政府多三年時間去實踐承諾，都唔想因更換執政黨而令政局進一步不穩，加劇經濟不確定性。
期望新一屆政府能兌現承諾，帶領澳洲喺未來三年持續穩定發展，並喺國際舞台上有所作為。
Comments
堅離地書院 College
會和澳洲同事商量 🙏
Zero
可以講講澳洲特別的Preferential Vote 選舉制度，係House Labour 多成倍議席，但Primary vote 只係多2%
堅離地書院 College
世界主流是4/5年，3年只有澳洲、紐西蘭等特例
堅離地書院 College
「成功帶領所屬政黨勝出選舉後，再勝出下一次選舉」 😅
INH
工黨執政三年、盈餘兩年，自由黨年年蝕錢。工黨大撒幣？
GBK
原來澳洲大選三年一次？頗為特別。
Jimmy
前總理莫理森在2018年接替Malcolm Turnbull成為總理之後,在2019年大選中成功連任. 當然你可以說他沒有完成2任(6 年)任期.
AC
一向不喜歡工黨的大撒幣政策，因為他們喜歡花錢討好選民，而不懂得賺錢。可惜今次Coalition 確實迷失方向。首先我不同意普遍選民認為Coalition對房屋問題沒有對策。兩黨都有方案，不過兩個方案都不會馬上（起碼3年內）解決住房問題。細節不在這裡分析了，篇幅太長。個人認為Coalition提出的核能發電非常大問題，只要稍微懂得發電的人都明白根本行不通，除了澳洲人普遍對nuclear沒有好感外。不過最致命的地方是獻計用核能發電的人不明白目前澳洲用電的模式。目前澳洲自家屋頂太陽能發電已經令到發電站白天出現差不多要停止發電的地步；但晚上沒有太陽時卻忽然對電需求飆升。懂機電工程的人都知道，啟動發電機不是噠車，一噠就著，是需要暖機和很多步驟；停機容易著機難，否則英國政府都不會馬上接管British Steel，因為停了爐便不能五時三刻可以再啟動。ABC news已報導多次澳洲用電的模式，包括太陽能，風能，水力，燃油，天然氣發電的分析。另外，Peter Dutton沒有政治觸覺，昆士蘭水災他都不馬上飛去慰問，反而讓Albanese去了。佢連自己的選區議席都失去不是沒有原因的。再者Coalition打大陸牌在這個時候死定，大陸是澳洲的最大買家。美國加關稅，大陸轉而買澳洲產品，澳洲人得益。選民又怎會支持Coalition呢？歸根結底工黨好運，而Coalition沒有能人。如果Coalition再不好好反省，說不定自此一蹶不振。
