simonshen
patreon
【讀者分享：美國大選特輯🇺🇸】 支持侵侵的心路歷程：從一而終的反共抗獨裁
🕑 Added 2024-11-05 09:01:11 +0000 UTC【按：我一直希望可以在會員區內部做到當年「舊香港」能做的事，讓不同立場的朋友在無壓力的情況下暢所欲言，互相尊重，Chatham House Rule。美國大選是一個非常嚴肅、重要、也非常撕裂的題目，如果在公海，基本上不可能理性討論。連日的會員區訪問，嘗試請不同嘉賓從不同角度、地域、專業、立場談論這次選舉，其中前立法會議員陳偉業開宗明義非常反對特朗普，將他視為「法西斯獨裁者」，認為這是獨裁與民主之戰。為了平衡觀點，邀請了一位一直積極留言非常支持特朗普的會員，希望他可以簡單談談為甚麼自己成為「侵粉」。想不到他寫了一篇五千字長文來分享自己的心路歷程，依然言猶未盡，感謝他的用心之餘，也可見他真的非常、非常著緊。
雖然他的立論、用字和論證可能對不少朋友而言不容易接受，不少事實陳述也可能存有爭議，就像不少朋友難以接受強烈反特朗普的訪問，但這不是重點，畢竟我們不可能要求每一個人都用同樣方式表達。重點是我們應該理解雙方觀點的成因，而不是徹底失去溝通的橋樑，能夠「從現象看本質」，才是這裏的初心。能夠知道雙方最真實的觀點，繼而冷靜思考，我覺得始終是可貴的。】
承蒙沈教授邀請，想我寫一寫點解支持侵侵，難得我可以趁此機會，俾我整理一下自己點解會咁撐侵，我決定以時間軸既形式去寫呢個題目。
為何支持侵侵？因為要抵抗社會主義共產主義獨裁，恢復美國立國初衷以基督精神實施憲法共和，尊重個人自由同人權，縮小政府規模將政府權力歸還於民，經濟到政治都係小政府大市場。我覺得侵侵未必可以做足晒咁多樣，但佢既理想大致上符合以上原則。希望佢上任之後能做到列根咁樣，已經好好了。
支持侵侵係由2019年開始，因為我地既行動感動到侵侵，佢以支持香港人作為回報。2020年，武漢肺炎由中共国散播全球，侵侵係第一個人夠膽講 CCP Virus China Virus，直指中共要為疫情全球爆發負責，要調查武肺源頭，我當時覺得佢真係好勇好直率，肯講真話。要記得，而家執政緊嗰班社會主義法西斯政黨政客傀儡，仲大力批評侵侵種族歧視，話佢無證無據亂屈中共，亂咁封鎖航班阻礙中美交流，而家證明侵侵做啱咗，可惜估唔到封住中共、但無封到已被病毒入侵既歐洲，結果病毒一樣飄洋過海到大西洋另一面感染呢片土地上既居民。仲有世衞鹹濕菜，受中共指使隱瞞疫情，向美國施壓，亦拒絕源頭調查。事件真係令我好嬲之餘，亦佩服侵侵頂住壓力講真話做好事。
2020年，除咗疫情年亦係大選年。眼見侵侵不停受到成個社會主義法西斯陣營既不停抹黑同攻擊，真係戥侵侵辛苦，偏偏佢既唔認輸性格，令佢頂得住壓力，一邊競選一邊指揮疫情一邊處理政事，捱到大選嗰日都算神奇。但係，社會主義法西斯已經成功抹黑侵侵，成功塑造咗民意對佢既偏見，當時除咗清醒既侵鐵粉之外，主流媒體講乜嘢所有人都信，抹黑侵侵獨裁啦，講大話啦，性侵啦，詐騙啦，通俄啦。。。噏得出就噏，有機會抹黑一定唔放過，兼且盡力上綱上線到極點。
臨近大選，敗登個敗家仔部電腦被爆出醜聞，主流媒體係全部拒絕報導，仲要受社會主義法西斯指使反過來老作故仔，話呢件事係侵侵夾埋俄羅斯一齊作故仔老屈敗家仔，所以件事並無發酵到影響敗登既選情。講到投票，侵侵喺選前預計 Absentee Ballots 會係一個選舉舞弊既最大漏洞，可能會出現 Rigged Election，班社會主義法西斯就扭曲成侵侵要剝奪美國人既投票權，係用假議題去打擊人投票意願，當時疫情爆到 hom hom 聲，全世界交通都停滯，郵寄投票自然成為咗最獲接受既投票工具，但亦造就咗做票既好時機。
到咗選舉點票之時，寸嘴到爆既侵侵一早就宣佈定自己勝選，但後來敗登曲線遍地開花，單一事件可能性近乎零既事件，竟然多處發生，即係話比中六合彩更細機會既點票結果竟然喺我眼前出現，竟然喺自由燈塔既美國出現，以為目睹過香港抗爭無乜荒謬嘢未見過既自己，忽然發現自己實在太天真，借用大陸人所講既摧毀了我既三觀。點解可以咁架。。。
社會主義法西斯陣營真正將侵侵標籤為獨裁者既時段，正正就係大選日到2020年1月6號期間。呢段時間，侵侵陣營盡量利用法律賦予既權利，去爭取選舉覆議，期間亦爆出大量票箱被挪移同可疑既情況。最有印象係有一個票站點票職員，竟然以時間太夜要閂門為理由，趕走晒所有監票員，然後喺枱底拖出一個又一個既可疑票箱，喺無監票員既情況之下繼續點票，乜唔係話美國人好懶唔會同你加班架咩？點解你唔收工關閉點票站清空場地，聽日再黎點票既？竟然通宵點票？有無咁勤力呀？大家唔好唔記得，同年年初台灣大選，香港人助選，蔡英文連任，佢地係即日投票當晚已經出結果。天真既我，以為自由燈塔民主楷模既美國投票都應該同台灣一樣掛，香港最多都係通宵點到第二日朝就出結果啦，美國唔會差得過香港掛。。。年少的我實在太天真了。講返嗰單通宵點票事件，咁嚴重既事，佢地好簡單解釋啲票呢其實係點咗架喇，只係攞去過下機架啫，就咁輕輕帶過，我印象中件事無人調查就咁不了了之，至今仍係一個謎。仲有好多案例都係非常可疑但同樣無人跟進。批評侵侵拒絕承認選舉結果，根本就係假命題。
咁既情況下，侵侵喺選舉程序規範內提出爭議，我覺得好合情合理，但係社會主義法西斯就係都要扭曲成你無證無據話選舉舞弊，就係輸打贏要，就係濫用總統權力。睇住侵侵陣營每一招都被官僚體制既不作為化解，真係好灰，而成件事最高潮既一幕，亦係侵支持者唯一希望彭斯會否帶領否決認證選舉結果，而結果當然係無發生，隨之，絕望既侵支持者就要衝入國會，話俾班議員聽你地應該公平公正處理選舉爭議，但隨住有一位手無寸鐵退役女軍官侵支持者被近距離槍殺，跟住進入六四式鎮壓，所有侵支持者都絕望了，侵侵個樣都睇到佢頹晒，而傳聞中侵侵會 call 軍隊去幫佢沒有發生，反而侵侵叫 Pelosi call National Guard 出黎防止暴亂亦無出現，侵侵就喺公民抗命失敗中，黯然步下總統台階。
我見到既係香港人抗爭失敗既重演，示威者係和平既，衝入國會目的係話俾班國會霸王聽，你地叛逆民意係會招黎惡果的，但最終和平示威者被打為黑暴，社會主義法西斯施展擅長既文革式批鬥，要煮死呢班勇敢發聲既人，要佢地社會性死亡。在香港所見盡的，在美國重演了一次。繼香港人和平抗爭挫敗之後一年內又見證多一次，實在係對人生觀宇宙大爆炸級數既衝擊。
緊接的，雖然係由社會主義法西斯執政的四年災難，卻是還侵侵很多個公道的四年。以下逐一講講已實現既侵侵預言。
武肺疫情，不放不放還須放，證明侵侵所說的建立群體免疫比隔離更可靠，武肺只是普通流感。最近更有科研報告指出，武肺疫情很有可能來自武漢實驗室，證明侵侵並非無的放矢，「China Virus」 這個名詞係客觀既事實陳述。mRNA 疫苗係侵侵任內 Wrapspeed 計劃研發出黎既，啲社會主義法西斯當時批鬥侵侵根本無可能半年就推出新疫苗、批評侵講大話，結果咪做到出黎，而敗登上任只係執侵侵任內既成果。敗登仲自吹自擂，佢幫人打咗幾多支針，講真，佢地唔係學東方社會主義法西斯式強迫人打疫苗，聯同 Fauci 一齊硬推打針好，又點會有咁多人打呢？我相信如果侵侵任內係唔會強制人打疫苗。
俄烏戰爭，侵侵一早就警告德國及其他歐洲國家，唔好使用北溪氣管，咁會令你地被獨裁俄羅斯握住你地既咽喉，佢地就係唔聽，仲恥笑侵侵你係咪傻架。結果呢，普京咪就喺俄烏戰爭期間利用北溪牽制德國，令德國唔敢對烏克蘭全力支持。如果侵侵係普京既真朋友，咁又點解要警告德國呢？咪由得德國自己跳落懸崖囉，人地想死做乜要嘥氣阻止佢？
敗家仔 Hunter Biden 既電腦洩密事件，已獲 FBI 證明真有其事，證明當時社會主義法西斯指控呢個係侵侵聯合俄羅斯製作既假新聞，又双叒係一個佢地為抹黑侵惡意編造既謊言。最近有報導指敗登上任後布林肯聯同其他人一直掩蓋此事真相。
侵侵通俄門事件，經調查並無確鑿證據證明侵侵有通俄。當然，啲侵黑一定會反駁，無證據唔代表無。咁有證據架呢？希拉里電郵洩漏係證據確鑿係咪應該受懲罰？Hunter Biden 證據確鑿又唔駛查？啲厚面皮既人仲好意思叫侵侵上任後要特赦敗家仔，唔好政治迫害？
侵侵被控多項案件，包括紐約虛高資產價值騙取貸款被控詐騙，掩口費變成偽做文件，背妻同其他女子性交，私藏國家機密文件等案件，每單案都係政治檢控，每單案恕我只能簡單解釋。
第一單所謂詐騙檢察官跟本無 standing 去告侵，因為所謂受害人即係銀行都無提告，並且銀行代表作證借錢俾佢，唔係因為佢虛高資產價格，而係因為佢過去多次還款紀錄良好，咁究竟詐騙咗邊個呢？判侵侵罪成又要侵賠錢，點解係賠俾政府唔係銀行？因為跟本無受害者。
第二單掩口費案，指控侵侵經律師俾錢女子作為掩口費以律師費名義入賬係偽造文件，然後將同一單事件拆開每一份文件共34份，作為一條罪告佢34次，一罪多審，簡直係突破法律倫理底線，跟手憑創意上綱上線，話佢其實係選舉經費瞞報。加上罪案數量眾多，升級做重罪 felony，所以得出坊間所指控侵侵係重罪犯，不適宜做總統，真係創意無限。
第三單背妻同女子性交，其實僅屬私德問題，其實受害者係佢老婆，但人地老婆都未出聲，其他人又講乜嘢呢？如果因此就話佢唔適合做總統，克林頓你點解唔謝罪落台？民主黨支持者唔彈劾佢？要告侵就搵埋希拉里一齊告克林頓，離婚，登報譴責，你克林頓夫人做乜侵夫人就跟。
第四單私藏國家文件，敗登咪又一鬼樣？點解民主黨就覺得敗登無問題，侵侵就十惡不赦？況且侵侵喺交還國家文件上其實一直合作，負責調查既職員都無對侵侵有任何不滿，但去到大概2023年開始，忽然無預警突擊搜查 Mara Lago，連律師都禁止入現場監督搜查過程，真係好離譜。跟住先衍生聯邦法院大法官宣判總統任內因履行職務所犯罪行有刑事豁免權，但敗登帶頭話侵侵硬塞保守派法官，令到侵侵可以無法無天，所有主流媒體就一齊加鹽加醋大力攻擊。大佬呀，人地法官已經講明，只限總統執行職務先有刑事豁免，非職務罪行係不獲豁免，唔通侵侵真係可以週街強姦人搶人錢打人都免罪咩？班社會主義法西斯只許左膠官放火，不許右派總統點燈，真係好雙標好獨裁。
幸好，大部份既案件侵都脫罪，其他成立既案件，都正在上訴，亦有上級法院指出錯誤退回重審，起碼無因為案件影響到佢選情，實在係天有眼。
邊境既問題，侵侵又一次被證實係講啱晒。起圍牆，個賀同志當年係大大聲反對既，仲話起牆係 stupid 又話係面子工程 Vanity Project。好啦，而家殺人犯強姦犯黑幫土匪流氓間諜全部走晒入美國喇，而家賀同志先黎話會保障邊境安全，厚顏無恥到話自己最支持邊境安全，一個CNN Town Hall 專訪中主持問佢 is a border wall not stupid anymore，佢就係死都唔答，講一堆 Word Salad 帶你兜圈，真係社会主义优秀幹部。
眼睛雪亮既美國人，因為侵侵堅持講真話，對民眾真誠，從一而終，拒絕學社會主義法西斯雙標變色龍，加上歷史終於還侵侵無數公道，踢爆主流媒體已經變成社會主義法西斯既喉舌，講盡大話，公信力崩塌，加上侵侵永不放棄既精神，好多美國人都已經醒覺了，實在感到好欣慰。侵侵既支持者並唔係只有極右派，而係不分白黑黃啡皮膚，不論青年中年老年，不論男女，不分左右政見，都有好多支持者。支持者都係正常人，想經濟好，想通脹降低，想社區安全，想無流浪漢，想無毒品，想無非法入境者，想無強姦犯殺人犯黑幫流氓間諜，就係咁簡單，但偏偏社會主義法西斯就全盤否認，用社會主義辯證法建構自己既邏輯，去將呢啲所有由奧巴馬政府至敗登政府既施政災難，講成偉大成就。
夠喇，美國人認夠喇，社會主義法西斯競選口號係 never go back ，正常美國人就係想go back，返翻去以前自由自在歲月靜好既美國。既然行錯路又怕乜 go back？有無數人想侵侵死，有人幾乎用子彈攞佢條命，就差嗰幾個 cm 就射中腦，但就係嗰幾個 cm 就救返佢，除咗係神蹟之外，都唔知有咩理由可以解釋到佢如何逃過此劫。
本來想講埋全過程民主党有幾獨裁荒謬，去證明侵侵先係值得投嗰個，但篇幅已經太長，暫且不贅。
唔理選舉結果如何，侵侵都打咗一場非常漂亮既仗，代表基督精神保守價值打既重要一仗，喚醒美國人對美國立國精神既認識同興趣，重新認識獨立宣言，重新認識憲法及其修正案，從新認識美國歷史，重新認識共和制度，同埋認清美國自由保守價值同社會主義既分別。呢場仗，我睇到既係香港式知其不可而為之既抗爭精神，輸係正常既，贏係因為我地信念正確。我地已經贏咗人心，喚醒咗世人，輸而無憾，無悔，輸咗大選，咪繼續堅守同宣揚保守價值。
社會主義唯一值得我地學習既，係佢地永遠唔放棄發展自己既宗教式執着，佢地即使十萬八千里長征，即使蘇聯倒台，都從來唔放棄壯大社會主義勢力，幾十年後終於開花結果遍天下。既然社會主義可以堅持，點解自由保守價值唔可以呢？何況我地先係合乎邏輯合乎人性、兼且正確既嗰一面？即使今次侵輸，我地都唔會放棄，永遠要同反人類既社會主義戰鬥到底。堅持永不放棄，總有一日會成功。
而家唔係保守派散佈仇恨，歷史證實基督教先係多元平等包容 DEI 既先驅，大愛包容係基督教寫喺聖經既本質，行公義好憐憫係基督精神既 DNA，自由價值係基督精神既延伸。而家係社會主義法西斯利用基督精神既優點，去攻擊基督精神，基督教同保守價值先係防守既一方。
我個人認為，保守價值捍衞自由，但並無責任捍衞消滅自由人士既自由，享受自由者不獲賦予消滅自由既權利。東方既共產獨裁同西方既社會主義法西斯，喺管治同政治鬥爭既方法係毫無二致，同樣既操控主流媒體，同樣既洗腦教育，同樣假消息傳播，同樣既文革式批鬥，同樣既身份政治，目的都在於操控一班支持者去為自己集中權力，壟斷資源實施獨裁，利用自由作武器去消滅自由，全世界社會主義都一樣咁壞，應該被同等對待。
執筆至此，離大選日仲有兩日，願主保佑美國，賜我們智慧與力量保衞自由與人權，讓我們有權追尋自己既幸福，擺脫社會主義獨裁既奴役。
⏺ 【會員獨家影片・Simon會客室：國際前線--美國大選特輯 301 🇺🇸🇨🇦】 前立法會議員陳偉業：（一）我為甚麼不能支持特朗普？
https://www.patreon.com/posts/115064588
Comments
INH
即係唔係話沈教授po出嚟就代表你自己endorse，亦都同意應該有唔同觀點，但係係咪應該都審下稿先呢？比呢位人兄更加有條理、有道理嘅侵粉大有人在。單係見到成篇文loop N次嘅「社會主義法西斯」呢串newspeak已經唔明點解呢篇文po得出嚟
堅離地書院 College
大家咁熱烈，遲啲可能會寫一篇關於呢篇文章的個人閱讀感想 😅
悉尼 袋鼠
Simon嘅開場白好重要。 解釋刊登文章志在提供回音牆另外聲音。呢度唔係公海，大家知道刊登原因，就無以下我提出嘅情況。 不過Twitter已經睇好多，香港KOL聽好多，仲要以年計，無細讀。 MSM為咗 『平衡觀點』，都會直接報導、直播雙方當事人講話，主持亦唔會即場核實，因為以前都知道潛規則，頂多另跨大，但唔會講大話，個別立場就留返評論節目分析。 問題係過去8年，好多人唔再理會呢啲潛規則，而傳媒好一段時間唔即場矯正，變相成為disinformation參與者。
EY
沈教授有容乃大，海納百川👍🏽 雖然小弟才疏只能睇到文章8、9成，仍然非常感激教授登呢遍文章🙏🏽
yuki_hk__
Can’t believe writing with such quality can be posted here …
HK Glory
多謝教授安排！多謝Trump粉分享！希望大家唔好爭咬。向前看。
Carl Yang
說到內容爭議，當然不是單指立塲觀點。若只是立塲觀點分享，又何以令人敬佩呢。 敬佩當然是因為為了做對的事，做了別人所不會做的事。
pp lam
聯邦政府有權改到呢啲嗎？
Gary Au
恭喜侵侵勝選 , 啲人情何以堪
HO Wong
雖然文章中好多事件嘅是是非非我無本事分辨到；但字裡行間表達嘅價值觀，我buy! 樓上有師兄提到基督教精神同無神論。其實基督教精神對美國嘅重要性有好多大家談論過；許倬雲先生認為：美國最大嘅危機就係基督教精神萎縮。 一個人為咗俗世嘅正義、自由等願意犧牲，就係我所理解嘅基督教精神；同是否信教係無關嘅。
Good Year
有就美國2黨制, 限制左民主. 因為選擇資源太集中結構非常彊化, 但觀符Trump 既出現, 體現左現代既2 黨制 既所謂"黨"一樣會因為選票改變而改變路線, 其實係唔係對" 2黨制箝制左民主" 既回應呢? 以前既民主黨, 共和黨又多次改變就話離現代好遠, 但TRUMP係大家眼下出現既, 利害
lyk
One way to explain the fact that polarisation in this election goes way beyond eligible voters is using identities. What starts as interests and opinions becomes identity when it is socialised into a community, and we have more identities that we feel strongly about than anyone ever imagined. These identities are mostly dormant but get activated when threatened. When one member of the group is attacked, the whole group feels threatened. When choices in the media are few, the incentives of the media are not to offend anyone, in social media the opposite works. Social media does not just reflect, it also creates. Recommendation algorithms biased towards the loud, outrageous, colourful, inspirational and confrontational keeps our identities activated minute to minute. Now you have the political elite themselves also getting their reality feed from social media and wrapped around in a cocoon, who in turn weaponises this polarisation, as it is much easier to organise people against something than it is to unit a group of people on affirmative action. Now the self-reinforcing loop is complete, we are stuck in this state of polarisation in the US and beyond.
Circle8090
我覺得頗代表到普遍撐侵嘅港人立場
Vikki Wong
"恢復美國立國初衷以基督精神實施憲法共和"<-睇完依句已經可以收皮,美國超過一半人士話自己係無神論者
Emily Tam
Totally agree
K Wong
What I meant was the quality of his writing not his viewpoint.
Carl Yang
呢個就係我敬重教授之處。為咗做對的事（提供各種觀點），明知內容爭議依然刋登。為的是我們讀者仍有機會看到各種觀點，有機會理性討論
Chris
究竟呢篇文章有幾代表香港(2019黃絲) 支持trump 嘅人
Gary Au
我信, 一定有問題, 肯定背後有人做野, 今年連有錢佬都頂唔順民主黨 , 係時候換人撥亂反正
Gary Au
乜咁都比佢登.... 我以為唔支持賀大媽, 呢到會退款趕我走
Polly Yuen
反共抗獨裁？笑話!!! 侵侵最崇拜普京同習近平想點就點！😂
Polly Yuen
可惜如今嘅共和黨已經被攪個人崇拜嘅MAGA佔領！我寜願俾人畜無害嘅民主黨坐多4年，期待下屆共和黨搵返啲傳統精英, 如蓬佩奧, 我即刻支持！
Polly Yuen
希望大家認清事實，切勿道聽途說。誰人再說侵侵的眾多案件是政治迫害，就是對美國民主體系司法獨立的侮辱！ 民主黨太軟弱同左膠係唔抵爭，但如果因此而選返侵來玩轉呢個世界，be careful what you’re wishing for!
Gary Au
而家美國比敗登搞到好幸福, 零元購, 坐監可以免費變性, 學校要教小學生變性, 打機變晒DEI , 係時候比侵侵返來撥亂反正
WL
嘗試讀畢全文，最終都放棄了
卡路士
感謝文章, 但係侵侵真係好兩極. 我在 tw, 同不同人討厭過侵侵, 我的感覺係, 好多西歐國人(美/英/法/德) 好L L L L L 憎侵侵, 哈哈, 但係我地HK TW 對侵侵又無咁抗拒, 認為佢無咁假, 所以佢輸我又唔係好意外, Haters 真係唔少. 到今年, 我和來自英國的朋友交談, 他們都認為侵侵上場, 都打杖, 哈哈哈. 其實我的角度係, 要現在都打緊. 所以, 只能說..will see..... 但係侵侵佢有仆街, 但係佢個班底, 點都吸引過民主黨那邊. 哈哈哈
K Wong
I'm surprised Mr. Shen bothered to ask this person to write his/her opinion. Even more surprised he put it up on his Patroen page.
Siu
我想睇啲有少少水準嘅文筆。好似以前建制派起碼有曾鈺成寫啲高級詭辯迫你認真思考。呢篇完全唔入流。
lyk
This election had been one heck of an education on social psychology. And btw, studies find that “neither group responded to exposure to the other side by moderating its own views… hearing contrary opinions drove partisans not just to a deeper certainty in the rightness of their cause, but more polarized policy positions”. The good news is there is evidence that structuring “positive, collaborative interactions” can promote understanding, but there is not a ton of incentives out there to bring that into being. (Why We Are Polarized - Ezra Klein)
pp lam
Thanks for share. Pretty much summarised the thought of all trump supporters 👍🏻 睇下大舊議員會唔會寫返千字文反駁🤣 個人意見，遠離西方盟友單打獨鬥，對俄羅斯同中國都係利大於弊
Chapman Yeung
如果唔係教授嘅開場白，我應該睇唔到去第二段....
dave
一定唔會有 Pompeo. 佢係Trump心目中就係 deep state, 傳統精英。
carl mak
我諗侵侵都要返主流派在參眾兩院發力支持，又唔會完全無主流派人仕在政府，但有幾多人就呢⋯⋯
Good Year
不論佢勝負, 佢係將極左, 溝返D極右, 係拉返中間DD既
Gary Lee
@carl mak: 如果冇主流派背書侵都贏到，我又唔覺得侵需要佢地
堅離地書院 College
上屆班子基本上都係共和黨右翼主流派，龐貝奧 馬蒂斯 凱勒 全部好decent 新班子係可以好偏，特別係如果有 Elon Musk 同 RFK Jr
carl mak
呢樣嘢都係侵侵回朝的一個隱憂，個人希望最少龐貝奧可以一齊回朝，做返侵侵個剎車掣
Gary Lee
呢篇文令我諗起一樣野。想當初 2016 年特朗普當選，入主白宮頭兩年同習近平金正恩傾偈，遠離西方傳統盟友。及後龐貝奧角色漸重，才嘗試將形勢拉返近。現今若果侵再當選，但身邊近西方班臣子都好似話同侵割左蓆，再加上全世界右翼主義枱頭，自己顧自己。未來四年美國同西方關係會變成點呢？ P.S. 純粹好奇，好想知呢篇文係咪龔教授手筆 :)
edh0e
honestly, what the f##% did I just read?
