simonshen
patreon
【讀者分享】中國精英怎樣看香港巨變？
🕑 Added 2021-07-09 02:32:00 +0000 UTC我不是當代中國國情專家，亦冇睇過潘小濤所著的國情系列叢書(因為興趣不大)，不過工作環境關係，經常接觸不同的大陸生意和商人。
呢啲商人當然唔太可能係自由主義、民主主義的擁護者，政治光譜上亦當然係偏藍或偏紅，但呢啲人同時亦都非常討厭政治，佢哋最大的興趣係做生意。以往佢哋一般都唔關心政治，但自從有咗佔中、習近平上咗台之後，佢哋開始會喺閒言閒語中講政治，一方面當然係鬧廢青出嚟搞事，另一方面其實都喺度鬧林鄭月娥領導的香港政府，鬧佢哋鎮壓示威者的手段唔夠硬、香港好亂。雖然佢哋嘅生意同示威唔一定有直接關係(間接關係就肯定有的，部份行業經濟不景，市場資金減少，對整個經濟體必然有負面影響，分別只係影響大唔大)，但佢哋容易受示威的畫面影響，自然會慣性向年輕人出氣。
不過比較少香港人知道的是，大陸的商人其實更多喺度鬧習近平。
習近平一三年上台，打貪剷除異己(主要係江派)，在黨內樹敵甚多；另一方面可能是其本人毛派情意結，同時又怕被黨內其他派系(主要都係江派)政變推翻，所以習近平會想走極左路線、搞個人崇拜，搞政改令自己可以無限期連任，亦想搞一帶一路呢啲大project，目的還是想確立自己的個人威望，令自己個位坐得更穩，但有心無力，其對國際形勢錯判引發貿易戰，國際上中國愈趨孤立，同時中國經濟下滑(自文革結束後共產黨執政的唯一合法性)，反對習近平的人愈來愈多。
國安、監控、網軍、抓緊財質、避免商人走資，呢啲都係中國獨裁專政的基本功。但在於大陸商人而言，更荒謬的是被人告漏稅、逃稅，甚至係大企業被中共強佔1%股份，而且要在大企業中建立一個黨支部(類似你提過喺全香港所有中小學安插黨委書記監控)監控公司運作。做過生意的人都知道，每個生意人都有秘密，假如連自己生意的運作都要向黨、政府全盤托出，商人基本上不可能長存。
我理解，基本上呢啲都係大陸商人對習政府的共識(除非係小商人，小到黨根本不屑一顧)，佢哋的共同意願，其實係政府放軟手腳、改善營商環境俾佢哋做生意。但習近平已經虎騎難下，一落台恐怕就會被各方人馬追殺，所以佢只會愈來愈獨裁。
現在香港國安法的濫捕濫告，有沒有明確終站？我認為沒有(除非有日習近平去見馬克斯)。 對於大陸商人嚟講，香港的民主派、年輕人搞事自然非常可惡，但佢哋認為霸王硬上弓通過國安法，係另有目的。習近平最主要的敵人，其實唔係泛民(香港的民主派、本土派都已經內鬥、爭做民主大佬廿幾年了，精於群眾鬥群眾的中共又點會怕咗佢哋呢？)，唔係外國勢力(西方國家一直想做生意多過想搞人權外交，不是嗎？)，而係香港境內殘餘的敵對派系(主要又係江派)。係呢啲人先最有能力推翻習近平政府(由香港泛民助攻，煽動國內民眾聚集示威反政府)。
任何濫捕泛民、整到《蘋果日報》執笠，自然都係中共一部份的objective，但都唔算係primary objective，甚至只係中共權鬥的煙幕，只為轉移群眾視線。正如文革時毛澤東最怕的不是日罵夜罵的美帝，而是走反斯大林路線、修正主義的蘇聯，蘇聯比美國更有能力改變當時中共的權力結構。
我有個朋友曾經任職四季酒店的廚房部，雖然只係做廚房，但都已經夠佢喺其他同事收到唔少風。眾所周知，以往大陸的商人部份會選擇香港作為避難所，香港的四季酒店就最受大陸商人歡迎、被部份大陸商人長租，甚至係租總統套房之餘，再租多幾間房，俾整個保安團隊入住。有大陸商人入住後，酒店方面會私下提醒員工，要小心留意不要得罪住客。試過有國安入嚟酒店，強行夾走租戶返大陸，酒店方面是完全唔阻止、袖手旁觀，因為不想惹麻煩。現在香港通過國安法，香港的國安，就可以更明正言順去搜捕除泛民之外的任何政敵。
我在英國讀大學修歷史，內容看起來跟當代的香港時政相差十萬八千里，但從中我所得到最大的啟示之一，其實是一個地方的本土事務，跟其外交、世界局勢本來就密不可分。For instance，假如當時荷蘭沒有獨立運動，西班牙帝國自然就能夠騰空手來專心應付Protestant的英格蘭，現在的英國人還會歌頌Spanish Armada被童貞女王打敗嗎？
根據我自己的經驗，研究香港本土歷史的人，通常就只著眼於香港的本土史，忽略世界局勢，尤其是殖民宗主國的政局。文革、六七暴動這些視覺衝擊較大的事件尚且會被留意，其他細節就較為容易忽略。例如你先前介紹過魔僧顧汝德的《官商同謀》，裡面提到英國七十年代由工黨執政、催生港督麥理浩推行大量社會福利政策。中國政局自然容易成為評論香港時政的盲點，但當代中國政評也不容易寫，因為不易分辦消息真偽。要推演未來，怎能忽略這個視角？
Comments
Daisy
一直以來，有線中国組嘅存在，就證明好多人都好關心中国嘅一舉一動。
德州公
相當懷疑呢一位讀者誤判佢現認識嘅中國商人，中國經商絕對唔可能討厭政治. 因為政治風向一變，就會輕則傾家蕩產，重則冚家富貴. 點可以「討厭政治」？只有身處幸福香港嘅，先至可以天真地講「我討厭政治」. 注意. 喺香港成長然後喺中國經商嘅人，同埋喺中國成長經歷文革或 89 風波然後御准經商嘅人係兩種唔同動物. 我相信佢所謂「經常接觸不同的大陸生意和商人」，係接觸前者而唔係後者. 至於習派江派，我只可以話大紀元其實都已經落伍. 最後我想講支持習近平嘅中國人人數一定多過反對佢嘅人人數. 習近平江山絕對穩固. 所以，標題為「中國精英如何看香港突變」絕對誤導，係標題黨.
K小白
其實“權鬥”係“帝制”嘅遺物 支那就改不了“奴性” 唔鐘意用腦，有得食，唔駛死就得 呢個唔只係“外交”同“內政”，仲有世界時局嘅問題 係紮根於“中華民族”深層嘅“人物性格”，五千年“帝制”嘅“教化” 唔知咁樣算唔算係其中一個factor呢？
Louixx C.
呢個角度幾有趣，希望有高人回應解答一下
Chung
睇完呢篇再諗番教授上一篇講中共比蘇聯優勝既地方，咁美國其實支援江派已經夠推翻中共?
Gary Lee
我上幾篇已這樣留言: 好多人以為今日共產黨已經唔再共產，卻唔明白咩叫"有中國特色嘅共產主義"。今時今日嘅共產黨，表面資本，實際就只係嘈肥你先共你 d 產。簡單說法就係馬列都仲當人係人，今時今日嘅中共直情當你係牲畜，養肥、然後、劏。 唔好以為佢地對香港人先係咁，你問問馬雲就知。
Andrew Wong
呢個觀點N年前都見過了, 好流
George
回看中共歷史，無論在那個時段（建党初年，國共爭鬥，抗日戰爭，內戰，建国初年及往後一連串反人性社會政治運動，及至開放改革，六四事件到加入世貿），在那個地方（本土，西藏新疆，香港，台灣及至西方國家），它的成功在於徹底了解和利用人性陰暗面，在關鍵時刻靈活變通，故能渡過一個又一個難關至現今強国崛起反威脋西方國家。但中共體制也有致命弱點，就是權鬥。在中共政治贏家全取原則下，權不僅代表成與敗，更表示非生即死極端下場。故歷代當權者不惜一切也要除去不穩定因素，所以中共慣常不斷製造矛盾，不斷尋找新敵人，而外交往往是內政權鬥延續。以中共現時經濟實力及党国機器相助，要有所謂「經濟支爆」發生或者要等十多年甚至幾十年。相反因政權透明度低，又建立於爭鬥意識形態下，「政冶支爆」隨時可以發生。對外愈戰狼，對內愈嚴控，代表政權愈不穩，党內高層權鬥愈劇烈。短期內會否武統台灣，很大程度視否當權者有否被迫到去孤注一擲絕境。 在政治支爆或權力轉移前，香港情況沒有最壞，只會更壞，因為各方勢力權鬥會率先以代理人鬥爭在我城上演。不論是想保留全国唯一走資渠道，凍結政敵資產或進行美中博奕，共通點是誰能掌控香港，誰就掌管與西方金融聯繫最後一道橋樑。不管誰是最終大贏家，在香港人和西方國家心中，此城已不能重返「大變革」前國際舞台地位。信心可失不再復，往昔一去不復返⋯⋯
June yu
19年送中法係人都知，點會係為咗送走條陳pk 呢？
Ls Kwan
我以前都唔睇呢d嘢，但而家覺得呢d就係香港嘅未來，好似冇得避咁，愈睇愈心up
Good Year
拉返大陸,,,點會係活生生打死, 成個集團咁大, 唔拉返去點理清件事, 不論點香港都仲係行簽名, 文件無得夾硬, 但人有
Wendy Lam
我都唔buy 呢一個說法!😊
Ls Kwan
關於黨支部，端裏有詳細說明，簡單嚟講就係細思極恐。現在中國很多私企要成立黨支部，而企業內的決策也被企的黨委左右，例如他們可以否決企業的部門經理任名。「黨是領導一切的」甚至要寫入公司章程... 然後，現在很多私企董事和管理層都兼任了黨委書記或其他職務，就是為了保留他們的決策權，但同時他們跟政府的關係也更「密切」了 https://theinitium.com/article/20210701-mainland-ccp-organization/invite_token/QdJNLLMMXD
已經2021年，仲係度用習江內鬥解釋中國嘅情況？？
Martin Chan
呢篇分享好高質亦好有啟發性！多謝！
JY
但更加想知d大6商人仲覺唔覺得得香港係走資好地方。如果已經唔係，佢地仲有咩新方法，走去邊？ 遠赴美上市，又會唔會好似didi咁？
Wendy Lam
其實我認識一位喺澳洲讀緊大學嘅網友，佢來自廣洲。佢一向都話，其實好多大陸人都憎习维尼，只不過喺果度唔敢出聲啫! 另外，據聞肖建華，都係喺香港四季酒店活生生被打死!😨😨
Paul Lam
睇完作者篇文 香港人（無論黃/藍）對中國政治了解都係bb班
Luna Yee
畢竟香港只係一個城市（好聽啲講一隻曾經會生金蛋嘅鵝，其實都係權力角力的一隻棋。同意認清國際形勢或者國情係好重要
