simonshen
patreon
【讀者分享 🇦🇺】 跟李偉才博士的《香港時空》的一次研討會
🕑 Added 2025-10-14 02:01:01 +0000 UTC最近參加咗一個有關香港人文化身份認同嘅圓桌研討會，十幾位來自唔同行業、背景各異嘅參與者，圍繞住呢個題目展開一場討論。雖然我因為有其他事情要處理中途離場，不過當中幾個觀點都令我印象深刻，覺得值得攞出嚟同大家一齊研究吓，集思廣益。
老實講，要討論「香港文化」其實係極度困難嘅。唔同年代、唔同社會背景、甚至唔同政治氣候之下成長嘅香港人，都活喺自己那個時空嘅香港。所以「香港文化」本身係一個流動嘅概念，冇人能夠代表晒所有香港人。簡單啲講，文化係多元嘅；但意識形態，就往往更顯一致。
我最近就有個例子，一位越裔同事同我講，佢做咗三十幾年人，一直都分唔清「中國人」同「香港人」，以為係一樣。直到佢同我哋幾個香港人共事咗三年幾，佢話終於睇出條界線。唔係能力問題，而係做人處事、對人對事嘅方式都唔同。佢形容：「同香港人共事舒服好多。」一句已經講晒。呢啲細微但又根本性嘅分別，正正反映出我哋所謂「意識形態」嘅真正距離。
香港人其實係一種「夾縫式」嘅存在。喺討論中有朋友笑講，話香港人永遠活喺身份錯亂之中：返香港會俾人話「鬼仔鬼妹」，返到澳洲又變返「Chinese」，好似精神分裂咁。原來唔止我有呢種感覺，座上好幾位都話中晒。可能正因為咁，香港人嗰份游走中嘅自覺，反而成咗我哋最真實嘅文化印記。
至於香港人嘅國際視野，就更加係共識之一。喺澳洲職場滾打咗一輪，就知道本地人嘅國際觸覺真係「另類」。除咗SBS國際新聞外，晚間電視台仲係嗰啲細囈過細囈的新聞，一些國際大事可能要靠Facebook、X等渠道得知。你會發現，呢個國家其實幾「安逸」，甚至有啲「井底」。所以香港人喺外地更應該堅持自己嘅視野，唔好俾呢種封閉慢慢吞噬。
討論入面「平台」（platform）同「網絡」（network）兩個字出現得特別多。唔係話要搞大台，而係點樣創造機會，等香港人可以向澳洲社會展示自己嘅獨特性。可以係市集、社交群組、網上媒體，總之係一個互相串連嘅過程，令到香港人嘅故事繼續有人講、有人聽。
但講到底，最令人無奈嘅係，大多數香港人喺呢方面都相當被動。資源有，能力有，唯獨係「肯唔肯投放時間」。好多時都話支持，講到要親身落場，就又有千百個理由。其他族裔人口比我哋少得多，但佢哋可以靠團結同埋實幹，為社區創造遠超比例嘅影響力。反觀香港人，往往停留喺「識得講」階段。
我希望呢次嘅討論唔好又淪為一場「學術式反省」。如果真心想令「香港人」三個字喺雪梨、甚至澳洲響起迴音，就要由我哋自己開始。唔可以只係停留響懷舊、亦唔只係自我感動，而係要喺社區入面留下實際足跡。咁樣，香港人嘅聲音先至會被聽見。
Comments
堅離地書院 College
應該答 はい
Gary Lee
呢樣野我響唔同地方講左好多次，去到西方，十之八九嘅人都係唔會知點樣分你中國人定香港人，西方人對中國人嘅 stereotype，其實香港人係食晒。有次我去客人那裡做野，客人最後問左我一句：“You are very polite. Are you come from Japan?” 當我應佢係黎自香港，佢只有一臉訝異。
