ivanliresearch
patreon
上個月債券回報係史上第８好，股市回報只係史上第18 - 但股市回報係債券嘅double — 所以當然買股票。至於風險？就同你研究下有冇得減低
🕑 Added 2023-12-07 15:30:35 +0000 UTC11月頭叫埋你買股票，之後美股一個月升8%，史上排18。
咁你要只買港股，就當然唔係我嘅問題
幫你食正一個月9%，都仲唔滿意嘅，咁不如你教我一年賺5倍，我畀錢你
股票好過債，減息都係。TLT一個月升10%，但公平比較應該指數對指數
債券指數11月升4.5%，史上第8好。美股升9%，史上第18
即係話，股票史上第18好嘅回報，係債券史上第8好嘅 – 一個開
咁但你會話：股票跌時又跌多啲嘛，風險高啲 — 但，投資就有風險
債券當然一樣有風險，連跌三年，TLT高位插一半，只係你冇留意啫。
你自己印晒咁多年債券同股票回報出嚟，亂掟飛鏢，睇下邊樣好
股票跑贏，除咗有歷史數據，亦都係有真正原因的
根本由你睇呢個Patreon開始，就決定咗take risk—咩係risk？就係輸錢
問題唔係你take risk，而係拎唔到相應嘅回報
但：股票嘅風險，係可以通過長期持有降低的！
1. 實在令人有啲吹脹，11月頭已經寫明叫你「買啦！仲等？」。講明叫你買股票，然後美股一個月升9%，史上第18好單月表現（out of 成1000個月）。但仲係有啲讀者好似唔多滿意，咁我都唔知可以點。
11月頭叫埋你買股票，之後美股一個月升8%，史上排18。
2. 雖然我多數都叫你stay invested，唔使亦唔好捉嚟捉去。但講market timing嘅，今次畀埋你。買乜都話埋你知，咁一向都叫你分散，你話你11月齋買港股，就當然唔係我嘅問題（而我11月港股倉都仲有錢賺！）。
3. 但當然好多人仲係唔信100% 股票呢回事，亦都覺得唔應該地域分散，甚至覺得長期持有搵笨。佢地最常用嘅例子就係港股 — 呢度已經係一種謬誤，你用咗最近期嘅例子，同埋揀咗幾十個股市中最差嗰個。嚟緊呢兩篇可以討論下呢類問題。唔係新嘢，但會有新角度。
咁你要只買港股，就當然唔係我嘅問題
4. 個系列講咗唔少嘢，但我第一篇已經講咗結論。買乜？當然係買股票。因為我就知道，好多人會覺得「減息梗係買債」。但我話你知，都係買股票，原因在後來嘅幾篇「減息都係買股」解咗。
5. 事實你見到，11月標普指數升9%，債券指數呢？如果睇彭博綜合債券指數，一個月升4.5% — 見到冇？「炒減息」之下，冇錯債券係升，但股票升得仲多嘛！我嘅講法，算係好準啦。咁你都唔滿意嘅，我都唔知點算好。
幫你食正一個月9%，都仲唔滿意嘅，咁不如你教我一年賺5倍，我畀錢你
6. 我幫你食正呢個一個月9%嘅回報，都有人唔滿意，覺得我應該100蚊時叫佢買Nvidia然後500叫你沽，咁我真係幫你唔到，不如你做到你教返我。
股票好過債，減息都係。TLT一個月升10%，但公平比較應該指數對指數
7. 呢度仲要補充一啲之前嘅文遺漏咗嘅嘢。第一，你見唔少人，包括我自己，都會拎隻TLT嚟講。隻TLT一個月都升10%，係丫，你買ZROZ唔止添。不過呢個比較，其實唔公平。好簡單，你只係用一堆表現最好（duration長嘛）嘅債嚟講。咁如果用TLT嚟比，就應該對應返個股，「拼多多一個月升三四成添」。
8. 見到問題冇？指數就應該對返指數。債券指數，就一般用彭博綜合債券指數吧。唔通你見拼多多今年狂升，就話中資股今年表垷好好？但呢啲咁基本嘅嘢，都好多人亂嚟。你同佢講股市指數，佢同你講TLT
債券指數11月升4.5%，史上第8好。美股升9%，史上第18
9. 然後可以講多少少。呢個債券指數，上個月升4.5%—其實已經係史上第8最好。甚至係四十幾年嚟最好嘅一次 — 但都只係得4.5%。
11. 相反，上個月標普指數升9% —只不過係史上第18好嘅表現
12. 有冇見到啲乜呢？你應該留意到。
即係話，股票史上第18好嘅回報，係債券史上第8好嘅 – 一個開
13. 放埋一齊，你見到乜？債券一個月4.5%，史上第8好。股票一個月9%，史上第18好—即係話，股票第18好嘅月份，都仲高過債券一個開！
14. 喂，明明係「炒減息」喎。應該債券升？係丫，不過股票升得更多，呢個係極之多人嘅盲點。而我真係早早同你講，抵我牙刷，係咪？
咁但你會話：股票跌時又跌多啲嘛，風險高啲 — 但，投資就有風險
15. 咁當然你會話，扯，咁股票風險高啲嘛。升時升多啲，跌時又跌多啲啫。
16. 係喎！正是如此，風險與回報嘅101，針無兩頭利，梗係咁架啦。問題係，拉勻呢？同埋，睇長期呢？
債券當然一樣有風險，連跌三年，TLT高位插一半，只係你冇留意啫。
17. 啱，但所以可以帶到去另一個問題：亦係我一路講嘅問題 — 你認為投資是甚麼？投資就必然係有一定風險嘅。十分明顯地，你唔好以為債券「冇風險」，頂多只係低過股票— 之前一樣連跌三年，甚麼TLT ZROZ嗰啲高位跌五六成 —美債咋下，都未同你講會爆煲嗰啲公司。
你自己印晒咁多年債券同股票回報出嚟，亂掟飛鏢，睇下邊樣好
18. 冇錯，股票升係升多啲，跌亦跌多啲。但拉勻呢？當然都係跑贏債券的。我一路都講，100%股票，股票是最好嘅投資。仲係有人唔信嘅，自己睇上面嘅圖。你唔好事後畫靶同我講，2000-2002年，美股連跌三年，債市就連升三年。
19. 畀啲良心同常識，你可以印個圖出嚟，放在圖上搵隻馬騮掟飛鏢。每個圖任掟兩格。我同你賭足100局，肯定係股票嗰邊贏錢多過債券。
20. 呢種方法極其重要（其實同人地做Monte Carlo Simulation 差不多）。唔該大家，量度啲風險回報時，記住你個「框」要係隨機。否則你實可以框一段時間，呢堆嘢跑贏。你見坊間好多嘢打橫嚟講，都係只係捉住某一段時間。你只係捉住今年講嘅，咁梗係分散投資多餘啦？買美股？唔好。梗係借孖展買Bitcoin買阿根廷股買Nvidia．
21. 然後有啲人覺得我係「拎啲半世紀前嘅數據嚟講」—錯，係任你掟兩格。平時我講嗰啲一年幾多回報，都係大約咁嚟。唔使一定拎到五十年一百年。根本多數interval 嘅平均就係咁
22. 咁歷史任你掟嘅大現象你唔信，你要夾硬拎「某幾年」嚟講，你覺得邊樣先係道理？你拎呢幾年港股講，咁唔應該買股票添，應該年年沽空添。但你會唔會？
股票跑贏，除咗有歷史數據，亦都係有真正原因的
23. 以上呢種思想實驗，舊文都寫過，但我唔明做乜都仲係不停有人同我講「美股夠迷失十年啦，你點保證之後唔會」「日本股夠迷失三十年啦，你點保證之後唔會」—係冇得保證的。
24. 但股票多數跑贏，係常識，有歷史往績，亦有理論原因，除咗企業盈利，亦因為股票風險大啲。
25. 呢啲亦都係以前講過：只係「數字」，當然冇乜意思，你總會搵到到底係名稱短嘅球會贏多啲，定名稱長嘅球會贏多啲，但難道之後我就不停買？股票跑贏，唔係「因為」以前啲數據係咁，係有原因的。因為間公司嘅盈利，就係股東分晒，債券持有人冇得分的。咁都唔明？（咁但當然，輸錢時亦係股東食，債券持有人照收息，除非你清盤 — 咁所以，債券風險咪低啲 — 咁又所以，回報咪又低啲！）
26. 況且，咪話你任掟兩年，都係升嘅年份居多囉。「咁你又點保證之後唔會升？」—點解只係搵啲最差嘅年份嚟講？
根本由你睇呢個Patreon開始，就決定咗take risk—咩係risk？就係輸錢
27. 我想講嘅係，投資就肯定係冒風險架啦，唔好自欺欺人。而一般都係風險大回報大，問題係如果你「付出」嘅風險太低，咁你回報根本都唔夠高，就真係冇乜用的。你同我都知放銀行最穩陣啦，但你做乜會投資？由你睇呢個Patreon開始，你已經係決定 take risk架啦
28. 而請問，知唔知咩叫risk？即係你係有機會輸錢架！我唔明做乜有人見到，喂，買美股長坐五年都有機會輸錢喎，所以唔好長坐 — 乜閣下有永遠唔輸錢嘅策略？（有嘅，唔買囉）
問題唔係你take risk，而係拎唔到相應嘅回報
29. 我諗真正嘅問題係，如果你take 咗risk但拎唔到相應嘅回報，就係最大嘅問題。例如你決定買股票，但你miss咗11月，或者你10月「止蝕」離場，就前功盡廢。當然公平地講，你亦可能會避開到啲大跌嘅月份。但咪講過，股票係升多過跌囉。
30. 當然了，買得唔夠大，亦係問題。但認真計數的話，你take緊幾多風險，其實同你買咗幾多有關。舉個例子：你買10蚊六合彩，雖然你total loss嘅機會極大 – 但對你嚟講，風險其實近乎零（除非你係小學生得20蚊身家）
31. 所以，take 得risk嘅，就至少去到買指數，一年10-12%。風險太低嘅，亦即係回報都低，根本點都唔夠你改善生活。
但：股票嘅風險，係可以通過長期持有降低的！
32. 而當然仲有一樣最重要嘅嘢，呢個圖貼咗有冇20次？但，風險係可以通過長期持有而減低嘅。我到而家都唔知道，不屑長期投資嘅人，可以點反駁呢個圖。
33. 又或者，換另一個角度睇，都係講同樣嘅嘢。呢張圖無非話你知，你坐得長咗，你嘅回報，就stabilizes在某個數，唔會爭太得遠 — 喂，呢啲咪即係降低晒風險囉。有數得計，唔會同預期偏差太遠。
34. 咁但，真係嘅，可能遲下都寫篇短文，又visit返嗰個「美股迷失十年」嘅問題，總有人問我點算，點避免。短答案，時間上分散，地理上分散。長啲嘅答案：冇得避免。難道你覺得「迷失十年」中冇人買股票？冇人係一買股票就想輸錢，但市場唔會因為你「想避免」而遷就你。
35. 事實你可以諗下，嗰個「迷失十年」，係你在成堆嘢之中，揀個最差嘅interval出嚟。呢個係咪常態？唔明咩叫常態？你搵隻馬騮掟飛鏢求其睇兩年，就係常態。
36. 最後，也不用質疑我上面啲圖用嘅係邊啲時段。第一個圖（藍色嗰個）肯定係比較耐，因為以前我都貼過好多次。但放心，你用新嘅數字去計，都會係咁上下嘅圖
37. 呢啲就叫定律啦，小朋友。我唔使計一次都知。你總唔會拎其他年份，就出到一個完全唔同嘅圖。正如你在賭場長賭，一定係輸死。
38. 仲有，唔一定係美股，你拎MSCI 環球指數，泛歐指數，都會係咁上下。回報可能冇咁高，但形狀應差不多。況且，美股全球最大，唔拎美股，拎乜？
39. 見到冇？啲「鄧小平」友，係令人十分沮喪的（唔知咩叫「鄧小平友」？係我Facebook成日講嘅故事：鄧小平日日煙不離手，依然好長命 — 所以有啲人就認為吸煙危害健康係假嘅。你真係唔好笑，大把呢啲人。正如你拎港股嚟反駁好多投資法則 — 咪鄧小平囉）
