ivanliresearch
patreon
［最終回］醜股大翻身（結局篇，下） — 標指成份股，醜股大翻身，一年work一年唔work，咁點？另外，2024買乜美股好？
🕑 Added 2024-01-20 08:03:22 +0000 UTC上回提要：標指成份股，22年掂，23就唔掂。相反都係。21/22又點？
2021年掂嘅嘢，2022年都仲幾好喎（雖然Signature Bank 之後爆煲）
2021年唔掂嘅嘢，2022年都係唔多掂—唔見翻身喎（雖然有堆消失咗）
咁即係，22/23就見「物極必反」，21/22唔多見 。咁點算？
退而求其次：不如睇下，係咪大公司嘅情況明顯啲？
標指500成份股都唔夠大？其實好多未聽過。不如縮窄到50隻
又拎啲50大市值公司出嚟，睇下兩年回報，scatter plot
Bingo！見到「大市值美股」，就兩年都見「物極必反」—其實合理
再用個簡單啲嘅目測方法
咁，就睇下2023年，50大公司，邊10間最好最差
睇睇呢10隻落後股，揀邊幾隻
1. 真係去到最尾了。上篇文做back test，睇標指成份股。咁見到2022年掂嘅，2023唔多掂．2022唔掂嘅，2023算幾好。大約都支持到個「醜股大翻身」理論
上回提要：標指成份股，22年掂，23就唔掂。相反都係。21/22又點？
2. 咁但係，如果做埋2021年同2022年呢？
3. 又睇下點。2021最強嘅標指成份股，就係呢堆。
4. 又睇下去到2022年，變咗點？照舊，Excel入面有，但我費事cap圖咁難睇。你可以自己開個Excel對一次
2021年掂嘅嘢，2022年都仲幾好喎（雖然Signature Bank 之後爆煲）
5. 咁見到2021年掂嘅呢堆嘢，去到2022年，平均跌2.2%—跑贏大市唔少喎，因為2022年美股跌18%。即係2021掂嘅嘢，2022都還不錯。
6. 不過特別留意，2021年表現第五好嘅係Signature Bank，2022固然大跌，然後2023年3月已經爆煲。
2021年唔掂嘅嘢，2022年都係唔多掂—唔見翻身喎（雖然有堆消失咗）
7. 咁如果睇2021年唔掂嗰啲呢？就係呢堆
8. 好啦，又係Excel度計咗。呢堆嘢去到2022年，平均跌16.5%—都算跑贏大市，但反而不及2021年掂嗰堆嘢。個「物極必反」唔多work
9. 但仲可以留意嘅係，呢20隻2021年唔掂嘅嘢，去到2022年都有6隻因不同嘅原因消失咗，但主要都係畀人收購：Activision Blizzard，Twitter，ViacomCBS，Discovery都係 — 咁如果計及呢啲，表現應該係好過上面計嘅數。但懶計了
咁即係，22/23就見「物極必反」，21/22唔多見 。咁點算？
10. 無論如何，咁即係點？即係，2022同2023比，就見到「物極必反」「醜股大翻身」，但2021同2022年比，就唔係好明顯
11. 咁點算？好啦，埋論上，你應該做多十年八年！（以前講掟飛鏢講過）。但你唔會咁得閒。我就唔介意，但你都唔會畀我咁呃幾十篇文。所以就算了。不過都係嗰句，我幾有信心記得，歷史上，都係多數時間見到「物極必反」，但當然唔係每一年。
12. 不過，實務上今次我地仲有另一個玩法：睇大公司！
退而求其次：不如睇下，係咪大公司嘅情況明顯啲？
13. 反正本身我就鍾意買大公司。你話標普500指數成份股都唔大？其實你睇真啲，除非你係美國人，否則好多公司你應該都係聽都未聽過的（當然有啲可能只係名冇聽過，入面做嘅嘢你知。例如VF就係North Face，VANS，Timberland）
標指500成份股都唔夠大？其實好多未聽過。不如縮窄到50隻
14. 咁不如收窄範圍啦，睇下最大市值嗰50間，睇下又見唔見到呢種情況？
15. 如果見到嘅，咁可能「物極必反」策略，比較適用於大股？聽落都好似合理丫。因為細公司可能真係一路變大，年年升。但大公司真係比較穩定，可能只係估值，或者當唔當炒，或者經濟周期。
16. 好啦，我可以發誓話你知，我做之前係唔知結果嘅。但一做落去，果然見到呢個「物極必反」，在大股比較明顯
17. 咁一樣，我唔會再將啲嘢重覆。但記住，我揀嘅市值50大，係用今日嘅市值計。咁中途當然未必間間係50大啦。邊度搵到嗰市值50大？我個Monitor Excel咪有囉，畀多次你。
18. 非常簡單，我拎晒呢50間出嚟。然後用Excel，睇下2021年嘅回報，再睇2022年嘅回報。就係上面咁嘅嘢。唔使解啦？Excel有
又拎啲50大市值公司出嚟，睇下兩年回報，scatter plot
19. 然後，就玩我最鍾意嘅scatter plot，就係一個咁嘅圖 — 喂，明顯見到係負相關
20. 留意都50個點，我費事每間咁label，但啲點你全部對得返。右下角，21年升125%，22年跌50%嘅，正係Nvidia．左下角，21年跌14%，22年再跌44%嘅，正係迪士尼。全部可以對得返
21. 好啦，照辦煮碗，整個2022同2023嘅scatter plot．更加明顯見到係負相關（不過，有冇留意兩個scatter plot比例唔同？）
22. 一樣，有啲好出名嘅股票你可以睇到。最右邊22年升80%，23年跌9%嘅，係油股Exxon Mobil．右邊數過嚟第二粒，22年升53%，23年跌16%，係另一油股雪佛龍Chevron
23. 最左上角，就係一堆大型科技股。最頂嗰粒，22年跌50%，23年升239%嘅，估都估到係Nvidia．跌64%升返194%嘅，Facebook．跌55%升返127%嘅，晶片股AMD。跌65%升返101%嘅，係Tesla
Bingo！見到「大市值美股」，就兩年都見「物極必反」—其實合理
24. 咁真係見到，無論係21/22定22/23，在50大市值公司，都同時見到個「物極必反」嘅情況—其實可能唔使做一次都估到。因為之前做過，指數都大約有呢個情況。咁總唔可能市值大嘅冇呢個現象，只得市值細嘅有，唔夠「拉」到成個效應的
再用個簡單啲嘅目測方法
25. 呢度再用個簡單啲嘅方法去睇50大公司嘅「物極必反」。呢度就咁目測都睇到（但唔係次次都咁明顯，所以都係用scatter plot拉條線最好）
26. 做法好簡單，只睇排名！睇下2021年，呢50間入面表現最好嗰10間，去到2022年，普遍都唔得啦。目測都見到
27. 相反亦係咁，2021年表現最差嘅嗰10間，去到2022年，就普遍掂
28. 然後去到2022年同2023年，都係有咁嘅現象。
29. 我都不再重覆。
咁，就睇下2023年，50大公司，邊10間最好最差
30. 咁於是乎，入直路啦。我地嘅「物極必反」，似乎集中睇50大公司好啲。首先我地睇返，呢10間，就係50大之中，2023年表現最好嘅公司。你都見，全部都係啲科技股。我就唔會而家加，但當然亦唔會沽（我知 Nvidia今年仲係好勁，剛剛又破頂，但我唔會而家追。又，真係早早買，另外坐得穩，你見跌七成我又唔沽，升5倍我都唔沽的，使乜止蝕？使乜食糊？）
31. 咁然後睇下，以下就係50大之中，2023年表現最差嘅10間公司
32. 咁可以肯定嘅係，一定係有啲衰嘢架啦！表現最差，梗係「有理由」，但真係未必要過份演繹。
睇睇呢10隻落後股，揀邊幾隻
33. 心水股，可能就在呢10隻股中揀。留意呢10隻都可以分到類
34. 首先，隻TMO，完全唔識。當然你可以去了解下，但我就不了。
35. 另外，Abbvie同Pfizer（輝瑞）都係藥廠，某程度上Johnson and Johnson都係咁上下嘅嘢，23年完全唔得。當然仲有同樣係石油股嘅Chevron同 Exxon。以及同係汽水股嘅可口可樂同百事（百事仲做唔少零食的），
36. 最後，Verizon同Nike有乜共通點？「都係埃汾有買」，因為股價唔得，咪少提。扯，咁但Magnificent Seven我都買齊啫。所以拉勻還好
37. 上面呢堆嘢點揀？都話有一隻唔識，踢走先。有兩隻買咗，唔使諗。咁油股可能你二選一，我就唔識有乜分別，你叫我揀就揀Exxon Mobil（冇乜點解，直覺）。藥廠嘅，可能都係Pfizer，再加埋Johnson
38. 可樂同百事？照計係OK的，但話說2023年咁差，因為出咗啲新減肥藥。你開頭以為係「利好」，因為啲人不停飲汽水同食薯片（百事旗下有）都唔怕？正好相反，啲藥會令啲友唔想食呢啲嘢。
39. 呢十隻，今年暫時都普通，但又唔算太差。又睇下年尾會點。但心水，就應該係Exxon Mobil＋Pfizer +Johnson＋可樂。
40. 最後不厭其煩講多句：平衡。同埋睇你本身買咗乜。我冇叫你沽晒啲Nvidia然後去買可樂。如果太多科技股想諗其他嘢嘅，就係上面幾隻傳統大公司。咁但你冇科技股嘅，當然而家買QQQ都係好嘅。雖然最好，就梗係幾年前買
41. 當然如果你完全唔信我講嘅「50大市值」方法。你咪自己搵返2023年標指成份股，最好同最差嘅公司。邊度搵？個Text only Monitor咪有，畀多次你。
42. 另外，畀埋圖你
43. 另外睇下有冇心機，但好似真係有人問：如果睇國家呢？又係咪一年唔掂嘅股市，下年就掂？我未研究。但印象中，國家嘅情況冇咁明顯。「你睇恒指已經知」。但可能下篇再玩下。
Comments
藥股我幾鍾意，一路有ABBV 同 NVO，做後防一流，巿跌佢升，巿升佢都唔一定跌。不過我見幾間藥股都係 cash 少債又多，唔知有無隱憂。
